Боки фанзина «Глас Ректума» дзеведзешатих були полїпени на кабини ди-джея у диску у Руским Керестуре и по даскельо годзини людзе там стали и читали нове число. Тераз роздумайце чи ше дакеди дацо на руским язику так читало

После рокох и рокох чеканя, збераня праху и после вельочислених атакох “зуба часу”, после Пиндара, Софоклея, Пруста, после Шилерових естетских «теоретисаньох» и дефинованьох естетских катеґорийох, после Розенкраньцовей теориї “естетики бридкого”, после индустрийно-технїчних револуцийох, шветова литература и вообще науки о естетики, швет достава цошка дотераз нє видзене, нє наградзоване, а вшелїяк аж барз потребне. Мирко Горняк – ака Коле, ака (2) – Комшо, конєчно после шицких бурйох и биткох и войнох цо водзел, конєчно достава кнїжку своїх инфантилних поетских деґутантних амалґамох.

ПРОЦИВ ЕСТАБЛИШМЕНТА

Коле од дзеведзешатих рокох вше у даякей форми на “сцени” медзи младима,  вон писал на єден єдноставни способ о валалским идиотизме (твор “Турбо Мижо), о мутираню вредносцох, о нєзаслуженим богатстве дебилох, о власци дебилох, о авторитету валалских дебилох (твор “Реакционерски моци Руского Керестура”), о препасци нормалних инициятивох у живоце, о валалских бабузґерох и їх космосох (твор “Пияц news”), о валалских дзивкох (твор “Леона Дротарова – Мис Швета”), о алкоголизме лузерох, цо ше у цалим тим гаосу цалком нєпознаходзели, потрацели и нїґда ше на шини, як и сам автор, нє врацели (твор “Одисея 94 Solodrinker”).

Визначни аспект Миркового, цо твортельного, цо животного праксиса – то витирвала борба процив естаблишмента. Як процив локалного руского естаблишмента, так и процив сербского, односно югославянского (твор “Серем по статку”). Мирково твори углавним ше засновюю на руцаню римох, найчастейше “аб аб“, а дзекеди и “аа бб“, так же шицко тото мож похопиц як даяку форму хип-хопованя и Мирка, без резерви, мож преглашиц за таке цошка як керестурского Чак Д-а, Метод мена, Би рила у єдним целу, кед и нє менєй.

ХИП-ХОПЕР И ДИЛАН

Медзитим, окрим хип-хоп форох, Мирко кокетира и зоз єдну Боб Дилановску поетику, цо котра покус здогадує “Ballad of Hollis Brown”, як цо то при його геройови под меном “Яков Надьмишка”, додайме ту ище писнї “Прешлосц пред нами”, або “Нє жень ше Мижу!”, дзе ше рефлектує и найвисши квалитет Мирковей творчосци. Гоч, у принципе, зложиме ше ту шицки,  Мирко Горняк Коле        цо ґод виштрелї зоз свойого творчого пирка, то автоматски постава литературна класика, кед и нє менєй…

Розлики медзи нєшкайшим часом и часом кед Колейова кнїжка написана – вельки. Праве прето кнїжка нє будзе мац таку значносц за нєшкайшу младеж, як цо то мала дзеведзешатих рокох. Прецо? Теди бул период кед исновала єдна ултра-монотоносц, як у сербских, так и у руских медийох. А медиї ци, най нє длужим о їх уплїве, очи до швета и реалносци. У реалносци исновала єдна чежка криза котру, дакому хто то нє дожил, нєшка чежко представиц: безпенєжносц, понїжованє обичного чловека и руцанє го на колєна, до безвиходносци, худоби, саме еґзистенциялне питанє приведзене до питаня и то на медийох приказоване як уплїв якишик «висших силох», цо ше на нас пре «нашу супериорносц» нагнївали, док ше на руских медийох танцовало, рецитовало писньочки о радосци, бразди, косидби, о прадкох, служкованю, або о койдзеяких абстрактних постменструалних менталних онанисаньох, цо нє мали вязи зоз тим цо ше случує. З єдним словом, теди постояла векша потреба за таким дачим.

ГЛАС РЕКТУМА

Мирко Грняк Коле и Олеґ Колбас Колби теди, у тих “цмих часох”, видаваю “Глас Ректума”, дзе константно виходза твори котри облапени у тей кнїжочки и младеж до остатнього числа розґрабує тоту новинку. Боки того фанзина були полїпени на кабини ди-джея у диску у Руским Керестуре и по даскельо годзини було людзох цо там стали и читали цо пише у новим “Ректуме”. Тераз роздумайце чи ше дакеди дацо на руским язику так читало? Цо би було кед би на тей кабини стали гевти поабстракцени преганячки, браздованя и житованя (и то од людзох цо часто вязу вязовску з валалом нє мали)? Нє було би нїч.

Квалитет тей збирки, руку на шерцо, на даєдним месце слабши на даєдним кус лєпши, алє читаюци Колейово твори од старших ґу новшим (хронолоґия нє назначена у кнїжки), обачи ше константне пороснуце у квалитету и до конца, остатнї написани твори маю насправди єдну литературну чежину и автор, нажаль, праве теди и дзвигнул руки од шицкого и престал писац. Так дзвигли руки и престали писац цала тедишня ґенерация керестурских интелектуалних ентузиястох – Колби, Сопка, Здикс, Теньо-Хенк и други – и тота приповедка закончена. Нова ище нє почала и чежко же ше иста дакеди повтори. Збирку, єдноставно, требало видац скорей, лєм напевно нє було динарка за таки «експерименти» и цо ґод би то мало значиц и людзе престали писац и громадзиц твори по фийовкох.

ВИТЕРНЯКИ

Праве теди направена єдна дистанца медзи старима и младима творителями, медзи тим цо постояло и медзи дачим новим, иншаким, експерименталним и алтернативним насправди, понеже нєшка, кельо видзим, епитет алтернативи себе приписує кажди клокан.

Дистанца медзи ґенарациями ше можебуц помали риши, алє робиц дацо нове, иншаке од постояцого дифолта, шемох и смакох, то єдно мечованє зоз витерняками и тирва потамаль, покля даєден автор,наївни, шалєни, глупи, або хто зна уж яки – просто нє одустанє.