Mak Demoni

AIDS – Brainlow – Crazy Cusins – Decayin’ – KAATROG – S.M.Z – Stativa – Underwear – Wildnoize

DEMONI by mak magazine
Часопис МАК видал други компакт диск компилацию, тераз з “твардейшу“ музику. Слово о мр3 углавним векшином демо знїмкох дзещец ґрупох, компилация котра робена на релациї Анґертина, Нємецка, Войводина

UNDERWEAR: Керестурски бенд, зявює ше на габи панк-рока котра початком дзеведзешатих рокох, паралелно зоз войну, залюсла Войводину. Underwear мал даскельо предпроєкти же би ше под тим меном зявел 1994. року у составе: Кристиян Венчельовски Кийо (вокал, коавтор), Марко Маркович  (ґитара, автор), Янко Шомодї (бас ґитара), Желько Будински (буґни). Були побиднїки “Керстурияди 1997″, грали як предґрупа Love Hunters, Ґоблином, Атеист Репу. У Новим Садзе ше теди зявели перши керестурски ґрафити  “Underwear, RK Punk”.

Š.M.Z. (Šmerc Mertvih Zdohljinoh): 1994. року ше зявел филозофски бенд котри еґзистовал у фантазийох його членох и атракция за соблажньованє широких масох – так волане Ничеовске “филозофиранє зоз млатком” (по буґнох). Š.M.Z. грали black-death-gothics, у составе: Синиша Сопка (ґитара), Неджад Цифрич и Емил Папгаргаї (вокал). До бенда познєйше пришли Златко Челебич Хозе, Владимир Бучко Лаци и Ваня Дула. Зняли демо 1997, а на “Керестурияди” истого року “лайв” знїмок, после чого ше спонтано загшели.

DECAYIN: найозбилнєйши метал бенд зоз префиксом Керестурски, а творя го: Йоаким Дудаш (вокал, ґитара), Петро Дудаш (вокал, ґитара), Инґо Фрикел (бас ґитара), Ник Хомфелд (буґни). Ґрупа основана 1994. року у Нємецкей, у варощику Котенайму, нєдалєко од Кобленцу. На концертох грали зоз познатима менами як “Вадер” (Польска), “Катаклисм” (Канада), “Монстросити” (ЗАД), “Флешкравл” и “Акюзер” (Нємецка). Мали числени концерти у Бону, Келну и Лайпциґу, углавним по велїх местох у Нємецкей, Голандиї, Австриї, Белґиї и Луксембурґу. Од демо-албумох зняли Cries (1998), Take a Lick of the Pain (LICK) (2000), Battlefield Earth (2001), Silence from Within (2005) (http://www.decayin.com, http://www.myspace.com/decayin)

AIDS: (то занчи Аматерске инструменталне дружтво сендвич-сир). Керестурци. Почали грац 1997. року у составе Иван Медєши (вокал), Мирко Папауґа (вокал), Владимир Фейди (ґитара), Виктор Маркович (буґни), Иґор Сабадош (бас ґитара). У своєй краткей кариєри зазначели два наступи: на “Керестурияди 1997 и Керестурияди 1998″ року и маю єден албум демо знїмкох. Карактеристичне за нїх же були наймладши бенд на керестурскей панк сцени (мали по 14-15 роки). Активно грали до 1999. року.

PARADOX: керестурски бенд котри почал грац як метал-бенд 1997, у составе Сашо Палєнкаш (вокал и ґитара), Славо Палєнкаш (удерни инструменти) и Златко Русковски (бас), на Парадоксових проєктох наступаю вельочислени сотруднїки. Грали на скоро шицких “Дньовкох”, на” Фамусу” и локалних “свиркох”. Парадокс ма єден самовидати албум под назву “Rootenica”. Материял на “МАК ДЕМОни” поробел самостойно Сашо Палєнкаш, а рецензия му була представена у сербским виданю “METAL HAMMER”-у.

STATIVA: Керестурци. Бенд основани 1999. року у составе Мирко Горняк Коле (вокал, ґитара), Златко Русковски (бас), Владан Гарди (бубень). “Stativa” грає етно-панк, гард-рок. Музични-демо проєкт “Случай лаковерног детлича” зняти у марцу 2000. року и то перши явно обявени компакт диск алтернативней музики при войводянских Руснацох, гоч вишол лєм у двох прикладнїкох. “Stativa” бул єден з основних промотерох компилациї “20 роки поп-рок музики на руским язику: Най жиє Маршал”, у рамикох котрей отримани концерти у Новим Садзе и Новим Орахове.

WILD NOISE: ґрупа зоз Дюрдьова, настала 2003. року, заснована на ентузиязме граня и випиваня пива. Ґрупу творели: Данил Задрепко (вокал, аутор), Микола Молнар (гитара) и Ваня Дула (буґни). После нєвелїх пробох и проблемох з озвученьом и местом дзе проби отримовац,  ”Wild Noise” нїґда нє наступали явно, алє ше им поспишело зняц демо истого, 2003. року. Бенд ше “розошал”, алє дожил свойофайтову реинкарнацию у ґрупи “Пиво и Лубенице”, хтора грала у Дюрдьове на “Рок Фестивалу” и на “Опен Хеарт” Фестивалу котри отримани 2003. року.

BRAINLOW: Кересурски бенд. Перши музични крочаї ”Brdinlow” направели 2005. року кед почали грац рижни обробки панк-рок композицийох. З тим репертоаром ”Brdinlow” наступал, углавним у Руским Керестуре, на рижних ґитариядох, “Рок-Фешти” и “Водова фесту”. Члени ґрупи: Владимир Медєши (ґитара, вокал), Петро Надь (ґитара, провадзаци вокал), Златко Русковски (бас ґитара), Борис Бучко (буґни). ”Brdinlow” участвовал на змаганю младих бендох у Суботици. Знїмки на “МАК ДЕМОни”, направени у рамикох “Водова фест 2007″.

KAATROG тиж керестурски. Ґрупу формовали: Регак Борис (буґни) и Мученски Мижо (ґитара) и Иван Еделински, вжиме 2005. року.  Ґрупа достала мено ”Kaatrog”, цо, у ствари, нє значи нїч. Бенд грає свойофайтови панк-рок. Од початку иснованя, ґрупа Каатроґ пременєла пейцох шпивачох, а 2007. року ґрупи ше приключели Гудак Борис (вокал) и Медєши Андреа (бас ґитара). Грали на приватних журкох, “Дньовки 2006″ и “Водова фесту 2007″.

CRAZY COUSINS Керестурски “родзински” бенд. Основали го 2005. року братняци любителє панка, рока и ґаражней музики и прето є наволани Крейзи Казинс. “Кагинси” то: Иван Симунович (ритам ґитара), Андрей Симунович (буґни), Дориан Чизмар (соло ґитара, вокал), Желько Паланчаї (бас ґитара). Родзини премнєли басисту на Макаї Чизмара. Грали на “Дньовки 2006″ и “Водова фесту 2007″. Єдна их композиция “Njeskontani rozum” у медзиконтиненталним транфсеру у постпродукциї “МАК ДЕМО” заблукала до ”Kaatrog” фолдеру.