МУЗИКА БЕЗ НАЦИОНАЛНОСЦИ

Продукция каждей писнї далєко од аматерскей, обдумана зоз змислом, приповедку, идею. И нє муши вам ше кажда писня пачиц, алє сиґурно же видвоїце свойо фаворити

Перши раз у живоце пишем музичне огляднуце. Написац текст сом ше прилапела, прето же ше з часу на час любим уключиц до МАКовей роботи, алє окреме прето же бим ше упознала зоз нову, сучасну “руску” музику. Алє, музика нєшка нє ма националносц, кед же ю дакеди и мала. Интернет и сучасни технолоґиї дошлєбодзую же би Керестурец и Берлинєц могли направиц писню, як цо то поребел єден з авторох на тим диску, Иґор Орсаґ, а вец ю послац, наприклад, до Япону же би ше єй додали присмачки. И то шицко за даскельо днї. Тиж так, нє мушице познац композицию, читац ноти. И то шицко барз добре. Добре же ше Швет на таки способ зменшал, а музична индустрия муши глєдац способ же би на тарґовищу обставала и зарабяла як потераз. Исто так, добре же настали на дзешатки нови жанри, окреме кед слово о електронскей музики, а зоз другого боку жанри ше змишали, нєт твардих розгранїченьох, часто чежко одредзиц праве место, музични конар дзепоєдней писнї. Шицко тото дошлєбодзує талантованей особи же би ше виражела цалком сама без помоци других, лєбо у сотруднїцтве зоз велькима котрих у живоце нє мушела упознац. Тиж так, познати мена, продуценти, часто розположени дац свойо думанє и помогнуц музичарови котри им лєм прейґ мейла послала 30 секунди свойого дїла.

Electronica Ruthenica тиж так приноши рижнородни писнї. Писня у тим случаю може буц погришни термин, писню ше шпива, а тоту компилацию чежко одшпиваме. То єдна заєднїцка прикмета писньох на тим CD-у – скоро нєт вокалох. Окрем у писнї Каменє автора Шакнеляп. И вокали анї нє хибя. Тиж так, писньом заєднїцка добра продукция. Нє шицко по моїм смаку, даєдну сом лєдво дослухала, алє то лєм питанє мойого уха. Продукция каждей писнї далєко од аматерскей. Обдумана зоз смислом, приповедку, идею.

Нє фаховец сом и нє будзем коментаровац окреме кажду писню зоз компилациї. Можем вам у огляднуцу повесц цо ше ми пачи. Деян Мецек а.к.а Yandee котри ше зявює зоз двома писнями, а котри найблїзши мойому музичному сензибилитету. Тиж так, могла бим видвоїц писнї котри подписал Свекар, а знова причина єдноставна – така ше ми музика пачи.

На компилациї мож чуц, dubstep, electro, trance… И нє муши вам ше кажда писня пачиц, алє сиґурно же видвоїце свойо фаворити.